الحمد لله
اليوم قرأت على الإنترنت عن خطوبة شخص بحترمه وبقدره جدا
مدون ومدونة
بجد وأنا بقرأ المقال المكتوب أو اخر المقالات فى مدوناتهم كان نفسى أعيط
لكن للأسف الدموع لا تعرف طريقها إلى عيونى
تعرف طريقها إلى قلبى فقط
وجالى السؤال المزمن اللى بسأله لنفسى ؟؟؟
هل هييجى يوم وقلبك يلاقى حد ترتاح له للدرجة دى ؟؟
هل هييجى يوم وتحس بالحب وتحب حد يستاهل حبك دا ويقدر يحافظ عليك وعلى الحب اللى بينكم
مش عارف
الجواب دايما على الأسئلة دى عندى مش عارف
وكأن كل الدنيا بهمومها أقسمت إنها مش هتسيبنى فى حالى أبدا
فى مرة من المرات أحد الأصدقاء قالى :
إنته لو بطلت تبقى حزين ...الحزن مش هيلاقى له صدر حنين فى الدنيا دى
يا ترى فعلا هيكون دا اللى هيحصل ؟؟؟
إنى أفضل ملازم الحزن إلى الأبدا كدا
أو أفضل بدون حب ولا حبيب ؟؟
يا ساتر يارب
ربنا لا يكتبها على حد
من كتر الوحدة اللى بعيش فيها بقيت محتار ودايما فى سؤال ممل بسأله لنفسى
يا ترى ايه اللى ممكن ينسيك الوحدة دى
أنا إرتبطت من قبل كدا وحبيت واتحبيت بس برده كنت بحس بالوحدة
يمكن لان الطرف التانى مكانش بيحبنى بجد
ولا يمكن عشان الطرف التانى مش حاسسنى
ولا ياترى أنا اللى وحيد بالفطرة
مش عارف
لكن أكيد إن شاء الله هعرف فى يوم من الأيام
