أنا خلاص رجعت مقري الرئيسى والرسمى والوحيد : العباسية
هرجع لأيام زمان
هرجع أكتب بدون ما أقعد ألحم فى السطور وأكمل السطر للآخر وأقول اللى عايز يقرا يقرا واللى مش عايز هوا حر
هرجع تانى نفس ذات الشخصية المعذبة اللى مخنوقة من الحياة اللى بتكره الإختلاط بالناس بأى شكل كان
هقفل الفيس بوك اللى مبقتش برتاح فيه ولا حد بيكلمنى وصحابى بيطنشونى
هقفل الميل اللى معمول له مليون ومليون بلوك من ميت شخصية برغم إنى ساعدت كل الناس دى تبقى أحسن
هقفل المدونة اللى مبقتش برتاح فى الكتابة فيها ولا بقيت عارف أعبر عن نفسي جواها ولا بقيت عارف أقول أى حاجة
وكمان يومين لما أفقد الأمل خالص هقفل موبايلي اللى بيربطنى بأعز الناس على قلبى فى الدنيا دى
أنا هرجع زى زمان
هرجع أنا بكل العقد بتاعتى وبكل الخناقات بتاعتى والملل والوحدة اللى كنت بعشقها وكنت بحس فى التواصل مع الناس إحساس غريب وكأنى بكلم فضائيين
هرجع لنفسى وأقفل الباب وأتداري جوا ركن بعيد أوى جوايا بعيد عن كل الناس
هقفل قلبى تماما فى وش أى شخصية أو أى حد مهما كانت الشخصية كويسة ومهما كانت بتحبنى
هرجع أمشى زى المجنون بالهاند فري وإيديا بتتهز مع المزيكا
هرجع أقعد طول اليوم لوحدي بتفرج على أفلام ومستني الوقت يمر عشان أخلص الهموم اللى أنا فيها وأتحرر من كل القيود اللى مسكانى لأنها مربوطة بوقت
هرجع أسهر بليل وأطبق لتانى يوم وأصحى المغرب وأقولهم صحيتونى بدري ليه ومش بتعرفوا تسكتوا ليه وأنا نايم
هرجع أعاند فى المرض وهسيب رجلى تورم أكتر وأكتر وهسيب فقدان السمع الجزئى فى ودانى يتحول لكلى وهطنش تماما مشكلة الأنف والعملية اللى معمولة فيها بتجيب دم و مش ههتم نهائى بالهبوط اللى بييجى لى كل شوية وهرجع أبطل أروح للدكاترة وهرجع أشترى الدوا عشان أرميه
هرجع أحب الميرندا تفاح الخضرا وأحب كيس الشيبس بالشطة و بسكوت لمبادا بالشوكلاته وأتلذذ أوى بطعم السجاير الصبح مع كوباية القهوة فى البلكونة
هرجع زى زمان ببص عالناس من ورا القزاز وورا ألف حاجز وحاجز ومش بقرب منهم
هرجع أكتب بغض النظر عن مين اللى يقرا أو مين اللى يعرف أو مين اللى يحس
هرجع أسافر البلد تانى وأدخل المقابر بليل واصحابى يقفوا برا بيرتعشوا من الخوف وأقولهم إن الموضوع عادي جدا وإنى طلعت سليم
هرجع أحب السفر بليل وأفكر إن أسلم وسيلة للحياة هى إنك تبقى لوحدك لأن ساعتها محدش هيوجعك ولا حد هيعذبك
هرجع أقدم ساعة موبايلى ساعة قال إيه عشان أبقى عامل حسابى بالرغم من إن مفيش أى حدث مهم فى حياتى يستاهل يتعمل له حساب
هرجع أروح الجامعة بس عشان أتفرج عالعيال الصغيرين اللى لسه بيفتحوا عيونهم عالدنيا فى وسط أسرة وأب أنا محروم منه
هرجع كل عيد أفتكر أبويا وأقعد فى البلكونة أعيط وأفتكره وأنا لابس لبس العيد الصبح وأعيط برده
هرجع أبعد عن كل حاجة وكل الناس وأمشي بعيد عن أى تجمع ولو حتى كان من شخص واحد
هرجع أقعد بالساعات أفكر فى مشاكل وهمية وأحارب طواحين الهوا
هرجع أفتكر كل صاحب غدر بيا وسرقنى أو سابنى أو باعنى عشان مصلحته
هرجع أنا
ودا كفاية أوى بالنسبة لى عشان أعيش
مش مهم الحب
لأنه مش موجود ولو كان موجود محدش فاهمه
مش مهم الصداقة
لأن مفيش حد بيقدرها
مش مهم الناس
لأنهم ملهمش دعوة بيا
المهم إنى أعرف أنام الليلة دى بدون ما أحلم مليون حلم يصحينى موجوع
أنا فى الآخر هحمد ربنا إن أنا أنا وإن أنا نفسى
لأن نفسى هى الوحيدة اللى مش هتسيبنى وتمشى لأنها حتى لو بتحبنى مفيش فى إيدها إختيار
وأنا بحبك يا نفسي أوى أوى أوى
ومش عايزك تزعلى من كل اللى حصل
دى كله شوية تغييرات بسيطة وهنبقى كويسين أوي مع بعض
المخلص
عباسية
No comments:
Post a Comment